काठमाडौं-वैदेशिक रोजगार विभागले आजदेखि पुर्व श्रम स्वीकृतिको सबैका अनलाइन प्रणालीबाट शुरु गरेको छ ।

विभागले राजदूतावासबाट प्रमाणीकरण गरिएका कागजातहरु वैदेशिक रोजगार सूचना प्रणालीबाट प्राप्त भएको आधारमा म्यानपावर संस्थाका मागपत्रका लागि अनलाइन पूर्व स्वीकृति, विज्ञापन प्रकाशन, अनलाइन आवेदन र अनलाइन श्रम स्वीकृति प्रारम्भ गरेको छ ।

रोजगारदाता देशबाट म्यानपावर कम्पनीले ल्याएका सबैका डिमाण्ड अनलाइन प्रणालीबाट हेर्ने र अन्तर्वार्ताका लागि आवेदन दिन मिल्ने गरि काम गरिएको विभागका महानिर्देशक भीष्म कुमार भुषालले जानकारी दिएका छन् ।

वैदेशिक रोजगार कार्यालय ताहाचलमा पेश गरिएका पूर्व स्वीकृतिका फाइलका सबै काम अनलाइन प्रणालीबाट हुने विभागले जनाएको छ ।

विगतमा म्यानपावर कम्पनीले राखेर प्रतिनिधि फाइलका बोकेर विभागसम्म जाने गरेका थिए । अब भने सवै काम अनलाइबाट हुने भएकाले प्रतिनिधिको आवश्यकता नपर्ने विभागले जनाएको छ ।

डिमाण्ड प्रमाणीकरण भएका तर, वैदेशिक रोजगार कार्यालय ताहाचलमा पेश नभएका फाइलहरु पेश गर्न र पूर्व स्वीकृति लिईसक्न पुस मसान्तसम्मको म्याद दिइएको छ ।

८ सय ५३ इजाजतपत्रवाला संस्था (म्यानपावर)का सूचना प्रणाली चलाउने कर्मचारीहरुका लागि विभिन्न चरणमा तालिम सञ्चालन समेत विभागले जानकारी दिएको छ ।

विदेशस्थित सबै नेपाली राजदूतावासले अनलाइन प्रणालीबाट काम गर्ने सहमति जनाएको र कतार मलेसिया ओमन र कुवेतका दूतावासले आजैबाट अनलाइन प्रणालीमार्फत काम गर्ने शुरु गरेका छन् ।