धनगढी- ब्याडमिन्टनका प्रिन्स दाहाल र क्रिकेटकी कविता कुँवर सुदूरपश्चिम स्पोर्ट्स अवार्डमा वर्ष खेलाडी घोषित भएका छन् ।

खेलकुद पत्रकार मञ्च कैलालीले पहिलो पटक आयोजना गरेको अवार्डमा पुरुषतर्फ प्रिन्स र महिलामा कविताले वर्ष खेलाडी अवार्ड जितेका हुन् ।

मंगलबार आयोजित एक कार्यक्रममा प्रिन्स र कवितालाई अवार्ड प्रदान गरिएको थियो । पुरुषतर्फको अवार्ड जित्ने क्रममा प्रिन्सले मनोनयनमा परेका क्रिकेटका खडक बोहोरा र भारात्तोलनका सागर भण्डारीलाई पछि पारेका थिए ।

यस्तै कविताले कुस्तीकी संगीता धामी र हक्कीकी विन्दु विष्टलाई पछि पारिन् । वर्ष खेलाडी अवार्डसँगै प्रिन्स र कविताले नगद २५ हजार प्राप्त गरे ।

अन्य विधामा कसले उचाले अवार्ड

‘उत्कृष्ट प्रशिक्षक’

वर्षको ‘उत्कृष्ट प्रशिक्षक’को अवार्ड भारोत्तोलनका जीवन गौतमले जिते । यो विधामा उनीसँगै कुस्तीका राजेन्द्र चन्द र क्रिकेटका ज्ञानेन्द्र क्षेत्री मनोनयनमा परेका थिए ।

‘उत्कृष्ट युवा खेलाडी’

वर्षको ‘उत्कृष्ट युवा खेलाडी’ भारोत्तोलनका सागर भण्डारी घोषित भए । यो विधामा सागरसहित फुटबलकी चन्द्रा भण्डारी र उसुकी अलिशा खाती मनोनयनमा थिए ।

स्पेसल अवार्ड

यस्तै, ‘स्पेसल अवार्ड’ कैलाली जिल्ला खेलकुद विकास समितिका निवर्तमान अध्यक्ष दीपक सिंहलाई प्रदान गरिएको छ ।

आफ्नो तीनवर्षे कार्यकालमा खेलकुदको विकासमा महत्वपूर्ण योगदान दिएको भन्दै उनलाई स्पेसल अवार्डबाट सम्मानित गरिएको हो ।

‘लाइफटाइम अचिभमेन्ट अवार्ड’

‘लाइफटाइम अचिभमेन्ट अवार्ड’ सुदूरपश्चिम प्रदेशको खेलजगतका हस्ती श्यामसुन्दर शर्मालाई प्रदान गरिएको छ ।

उनलाई क्रिकेट र फुटबलमा लामो समयसम्म योगदान दिएवापत् लाइफटाइम अचिभमेन्ट अवार्डबाट सम्मानित गरिएको आयोजकले जनाएको छ ।

अवार्ड विजेताहरुलाई नगद र ट्रफी प्रदान गरिएको थियो । विजेता चार विधाका खेलाडीलाई जनही २५ हजार र लाइफटाइम तथा स्पेसल अवार्ड विजेतालाई जनही १० हजार रुपैयाँसहित सम्मानित गरिएको हो ।