काबुल– अफगानिस्तानमा सक्रिय इस्लामिक लडाकु समूह तालिबानसँगको वार्तालाई चाँडै निरन्तरता दिइने अफगानिस्तानका लागि अमेरिकी प्रतिनिधी जाल्मे खालिदजादले जनाएका छन् ।

गतवर्षबाट अफगानिस्तानका लागि विशेष प्रतिनिधिको जिम्मेवारी सम्हालेका खालिदजादले तालिबानसँग हालसम्म ८ चरणको वार्ता गरिसकेका छन् । यसै महिना अफगानिस्तानको राजधानी काबुल पुगेका उनले अफगान सरकार, अफगानिस्ताको नागरिक समाजका अभियानकर्मी तथा अन्य सरोकारवालाहरुसँग तालिबानसँगको शान्ति प्रक्रियाबारे छलफल गरेका छन् । उनी चाँडै काबुलबाट पाकिस्तान हुँदै कतारको राजधानी दोहा पुग्ने कार्यक्रम छ ।

अमेरिकाले चाँडै अफगानिस्तानबाट सेना फिर्ता गर्ने र तालिबानले अफगान सरकारसमक्ष सुरक्षाको ग्यारेन्टी गर्नेगरी सम्झौता हुनसक्ने सम्भावना रहेको अन्तर्राष्ट्रिय सञ्चारमाध्यमले जनाएका छन् ।

यता तालिबानले भने अमेरिकासँग वार्ता गर्ने विषय भने अनिश्चित रहेको जनाएको छ । आफ्ना केही प्रतिनिधि इण्डोनेशियाको राजधानी जकार्ता जान लागेको र त्यहाँ इस्लामिक धार्मिक नेता तथा धर्मगुरुसँग छलफल गरेपछि निर्णय गरिने तालिबानका प्रवक्ता जबिहउल्लाह मुजाहिदले जनाएका छन् ।
हालै तालिबानले पाकिस्तानी तथा इण्डोनेशियाली धार्मिक नेताहरुसँग छलफल गरेको जनाइएको छ ।

१८ वर्षयता जारी द्वन्द्वका क्रममा अफगानिस्तानमा तालिबानले पछिल्लो समय हालसम्मकै सबैभन्दा ठूलो भूभागमा कब्जा जमाइसकेको छ ।