काठमाडौं– १३ औं दक्षिण एशियाली खेलकुद सागलाई लक्षित गरी खेलाडीहरुलाई बन्द प्रशिक्षणमा बोलाइएको छ । विशेष प्रशिक्षणमा रहेका खेलाडीहरुले विहीबार (भोलि)देखि बन्द प्रशिक्षण थाल्नेछन् ।

मंसिर १५ देखि २४ गतेसम्म काठमाडौं र पोखरामा आयोजना हुन लागेको साग खेलका लागि आठौं राष्ट्रिय खेलकुदबाट छनोट भएका खेलाडीहरुलाई बन्द प्रशिक्षणमा बोलाइएको हो ।

केही खेलका खेलाडीहरुलाई देश भित्र प्रशिक्षण दिनका लागि विदेशी प्रशिक्षक ल्याइएको र केही खेलका खेलाडीहरुलाई वैदेशिक प्रशिक्षणमा पनि पठाइएको राष्ट्रिय खेलकुद परिषद्का सदस्यसचिव रमेशकुमार सिलवालले बताए ।

यसअघिका सदस्यसचिव केशबकुमार विष्टले सागमा प्रतिस्पर्धा गर्ने खेलाडीहरुका लागि राखेप च्याम्पियनसिप गराउने बताएका थिए । तर राखेप च्याम्पियनसिप नगर्ने मनस्थीतिमा पनि राखेपको पुगेको बताइएको छ ।

नेपालमा आयोजना हुने सागमा २७ खेल समावेश हुँदा नेपालबाट ६ सय ४४ खेलाडीले प्रतिस्पर्धा गर्ने छन् । त्यसमा ३ सय ३० पुरुष र ३ सय १४ महिला खेलाडी हुने छन् ।