काठमाडौं– वैदेशिक रोजगारीका लागि साइप्रस पठाइदिने भन्दै १० लाख ५० हजार ठगी गर्ने पुनम नेपाली पक्राउ परेकी छन् ।

नेपालीलाई प्रहरीको केन्द्रीय अनुसन्धान ब्यूरो (सिआईबी)को टोलीले काठमाडौंको सितापाइलाबाट पक्राउ गरेको हो ।

पुनमले वैदेशिक रोजगारीका लागि साइप्रस पठाइदिने भन्दै शान्त कुमार तामाङसँग १० लाख ५० हजार रुपैयाँ लिएकी थिइन् ।

पछि तामाङले आफू ठगिएको भन्दै वैदेशिक रोजगारी विभागमा नेपालविरुद्ध मुद्दा दर्ता गरेका थिए । वैदेशि रोजगार न्यायाधीकरणको कार्यालयले पुनमबाट १५ लाख ७५ हजार रुपैया हर्जाना भराउने तथा १ लाख ५० हजार रुपैयाँ जरिवाना र १ वर्ष ६ महिना कैद सजायको फैसला सुनाएको छ ।
वैदेशिक रोजगार न्यायाधीकरणको कार्यालयले ३१ असार २०६९ मा फैसला सुनाएको भएपनि पुनम भने फरार थिइन् ।

सिआईबीको टोलीले उनलाई मंगलबार काठमाडौंबाट पक्राउ गरी फैसला कार्यान्वयनका लागि काठमाडौं जिल्ला अदालतमा पेश गरेको हो । काठमाडौं जिल्ला अदालतले पुनमलाई कैद भुक्तानका लागि केन्द्रीय कारागार सुन्धारा चलान गरेको छ ।