इराक- इराककाे राजधानी बग्दादस्थित अमेरिकी दूतावासमा प्रदर्शनकारीले आगजनी गरेका छन् ।

इरानसमर्थित मिलिसिया समूहलाई लक्षित गरेर अमेरिकाले हवाई हमला शुरु गरेपछि प्रदर्शनकारीले दूतावासमा आगजनी गरेका हुन्।

ठूलो समूहमा आएका प्रदर्शनकारी दूतावास कम्पाउन्डभित्रै पसेर तोडफोड तथा आगजनीमा संलग्न भएका थिए । स्थितिलाई नियन्त्रणमा लिन सुरक्षाकर्मीले टियर ग्यास समेत प्रहार गर्नुपरेको थियो ।

प्रदर्शनकारीले झ्याल तोडफोड गर्नुका साथै कार्यालयका सामान बाहिर ल्याएर जलाएका अमेरिकी समाचार संस्था सिएनएनले जनाएको छ।

इरान समर्थक प्रदर्शनकारी इराकको पपुलर मोबिलाइजेसन युनिटसँग आबद्घ रहेका जनाइएको छ। अबु महदी अल-मुहाद्दिनसहित मिलिसिया समूहका तीन नेताहरूसमेत प्रदर्शनमा सहभागी भएका थिए।

इरानी समर्थक मिलिसिया समूहका नेताहरूलाई अमेरिकाले हवाई हमलामा निसाना बनाएको छ। पछिल्लो सातामा अमेरिकाले गरेको रकेट हमलामा कतैब हिजबुल्लाह समूहका मिलिसियासहित २५ जनाको मृत्यु भएको छ भने ५१ जना घाइते भएका छन्।