बाग्लुङ– नेत्रविक्रम चन्द (विप्लव) नेतृत्वको प्रतिबन्धित नेपाल कम्युनिस्ट पार्टी (विप्लव समूह)निकट युवा सङ्गठनका बाग्लुङ जिल्ला सचिव सहलबहादुर सुनारले जिल्ला प्रशासन कार्यालय बागलुङमा आत्मसर्मपण गरेका छन् ।

गलकोट नगरपालिका–४ का सुनारले सो समूह परित्याग गरी स्वतन्त्र नागरिकको हैसियतमा रहने प्रतिबद्धता जनाउँदै सोमबार प्रमुख जिल्ला अधिकारी लुकबहादुर क्षेत्री, प्रहरी उपरीक्षक नवराज भट्टलगायतको रोहबरमा आत्मसर्मपण गरेका हुन् ।

सो अवसरमा उनले एक प्रेस विज्ञप्ति जारी गर्दै पार्टी परित्याग गरेको घोषणा समेत गरेका छन्

‘नेपालको संविधान, कानूनविपरीत हुने कुनै पनि गतिविधि नगर्ने प्रतिबद्धता गर्दै पार्टी परित्याग गरेको घोषणा गर्दछु,’ उनले विज्ञप्तीमा भनेका छन् ।

विप्लव समूहमा लागेर विध्व‌ंसकारी गतिविधमा संलग्न रहेको अभियोगमा पक्राउ परेका सुनारलाई जिल्ला अदालत बाग्लुङले आइतबार १५ हजार धरौटीमा रिहा गर्न आदेश दिएको थियो ।