काठमाडौं– परोपकार प्रसूति तथा स्त्री रोग अस्पतालमा अब पुरुषले पनि बिरामी कुर्न पाउने भएका छन् ।

अस्पतालले पुरुष र महिला दुवैका लागि छुट्टाछुट्टै कुरुवाघर सञ्चालनमा ल्याएपछि पुरुषले पनि रातको समयमा बिरामी कुर्न पाउने भएका हुन् ।

बिरामी कुरुवाका लागि अस्पतालले ३५ जना महिला र ३५ जना पुरुष बस्न मिल्ने कुरुवा घर सञ्चालनमा ल्याएको हो । अस्पतालले यसअघि रेकर्ड सेक्सन भएको हललाई कुरुवाघर रुपमा  शुरुवात गरेको छ ।

अस्पतालको नयाँ भवन सञ्चालनमा आएपछि रेकर्ड सेक्सनलाई अन्यत्र सारेर कुरुवाघर सञ्चालनमा ल्याइएको अस्पतालका निर्देशक डाक्टर जागेश्वर गौतमले बताए ।

‘यो प्रसूति गृह केन्द्रीय अस्पताल हो, कुरुवा घर नहुँदा रातको समयमा पुरुष कुरुवाहरु बस्न पाउदैनथे, महिलाहरुकै लागि पनि सुरक्षित थिएन,’ डा गौतमले भने, ‘बिरामी कुरुवाको सहजताको लागि हामीले पुरुष र महिलाका लागि छुट्टै कुरुवा घरको व्यवस्था गरेका छौं । अब रातको समयमा पुरुष पनि बस्न पाउनेछन् ।’

अस्पतालले प्रसूति गृहमा पुरुषका लागि कुरुवा घरको व्यवस्थापन गरे पनि सूत्केरी महिलाको वार्डमा प्रवेश गर्न भने निषेध गरेको छ ।