अस्ट्रेलिया  –फिफा विश्वकप २०२२ तथा एसियन कप २०२३ अन्तरगत छनोट चरणको तेस्रो अस्ट्रेलियाविरुद्धको ‘अवे’ खेल नेपालले क्यानबेरास्थित रंगशालामा खेल्दैछ ।

अक्टोबर १० मा हुने खेलका लागि नेपाली टोली अक्टोबर २ मा नै त्यसतर्फ जाने तयारी गरिरहेको छ । १ साता अगाडि अस्ट्रेलिया उड्न लागेको नेपाली टोलीले सिड्नीमा अभ्यास गर्ने भएको छ ।

अष्ट्रेलियन राष्ट्रिय टोलीविरुद्ध हुने विश्वकप छनोट प्रतियोगिता अन्तर्गतको खेलअघि नेपाली राष्ट्रिय फुटबल टोलीले क्याम्पबेलटाउनमा रहेकाे स्थानीय एक क्लबकाे हाेस्टेलमा बस्ने र त्यहीँ अभ्यास गर्ने भएको छ ।

त्यहाँ बस्ने र अभ्यासकाे व्यवस्था अष्ट्रेलियन नेपलिज फुटबल एसोसिएसन (एन्फा) र गैर आवासीय नेपाली संघ (एनआरएन) अष्ट्रेलियाले गरेको हो ।

सोमबार सिड्नीमा पत्रकार सम्मेलनको आयोजना गरेर अष्ट्रेलियन नेपलिज फुटबल एसोसिएसन (एन्फा) र गैरआवासीय नेपाली संघ (एनआरएन) अष्ट्रेलियाले जानकारी दिइएको छ ।

आयोजककाअनुसार राष्ट्रिय टिमका लागि दक्षिण पश्चिम सिड्नीको क्याम्पबेलटाउनकाे एक क्लबकाे हाेस्टेल र अभ्यासका लागि व्यवस्थापन गरिएकाे छ ।

नेपाली टिमलाई स्थानीय हावापानीसँग घुलमिल हुने माहोल बनाउन र अवे खेलका लागि टोलीको मनोवल उच्च बनाउनका लागि सिड्नीमा अभ्यासको व्यवस्था गरिएको एन्फा अस्ट्रेलियाका अध्यक्ष बिजेन बटाजुले जानकारी दिए ।

बटाजुका अनुसार टोलीको स्वागतमा सिड्नीमा रात्री भोजको आयोजना गरिने भएको छ । नेपाली टोलीको एकसाताको बसाईका क्रममा लाग्ने करिब ५० हजार अष्ट्रेलियन डलर खर्चको अधिकांश रकम एनआरएनको युवा फोरमको अगुवाइमा उठिसकेको जानकारी पत्रकार सम्मेलनमा दिइएको छ ।

राष्ट्रिय टिमको समर्थनका लागि अष्ट्रेलियाका मुख्यशहरहरु सिड्नी, मेलवर्न, ब्रिजबेन र क्यानबेरा लगायतबाट ठूलो संख्यामा नेपालीहरु क्याबेराको जीआईओ रंगशालामा उपस्थित हुने तयारी रहेको एन्फाले जानकारी दिएको छ ।

नेपालले छनोट अन्तर्गत यसअघि दुई खेल खेलिसकेको छ । दुई मध्ये एकमा जीत र एकमा हार व्यहोरेको नेपालले तीन अंक जोडेको छ ।

नेपालले अब जोर्डन र अस्ट्रेलियासँग खेल्न बाँकी छ । नेपाली टोली अस्ट्रेलियासँगको खेलपछि जोर्डन जानेछ ।