सिरहा– सिरहा प्रहरीले अपहरणमा परेका पाँच वर्षीय बालकको सकुशल उद्दार गरेको छ । जिल्ला प्रहरी कार्यालय सिरहाले शुक्रबार पत्रकार सम्मेलन गर्दै अपहरण परेका बालकको उद्दार गरिएको जानकारी दिएको हो ।

अपहरणकारीले आफ्नी भागेकी पत्नीलाई फिर्ता पाउन बालकलाई अपहरण गरेको अनुसन्धानबाट खुलेको जिल्ला प्रहरी कार्यालय सिरहाका प्रवक्ता डीएसपी अपिलराज बोहराले जानकारी दिए । अपहरणकारीले बालकलाई अपहरण गरी आफ्नी भागेकी श्रीमती फिर्ता ल्याइदिन दवाव दिएका थिए ।

सिरहाको कर्जन्हा नगरपालिका–२ बन्दीपुरस्थित शङ्कर कार्कीको घरमा डेरा गरी बस्ने बच्चा यादवको पाँच वर्षीय छोरा शिवम् यादवलाई मुखियाले गत भदौ १० गते अपहरण गरेका थिए ।

रौतहट जिल्लाको कटहरिया नगरपालिका–६ का बच्चा यादव र भारतको सितामढीका शोभित मुखिया छ महिनादेखि कार्कीको घरमा डेरागरी बस्दै आएका थिए ।

गत भदौ २ गते उनकी पत्नी सुरेखा मुखिया भागेर बेपत्ता भएपछि शोभितले आफ्नो पत्नी भगाउन बच्चा यादव र उनकी पत्नी सुखनीदेवी मुखिया यादवले सहयोग गरेको आरोप लगाउँदै बालकलाई अपहरण गरेका थिए ।

प्रहरीले मुखियालाई सर्लाहीको विष्णु गाउँपालिका–५ स्थित नेपाल भारतको सीमाबाटै पक्राऊ गरेको हो । बालकलाई सकुसल उद्दार गरी परिवारको जिम्मा लगाएको छ । घट्नामा संलग्न अपहरणकारीलाई जिल्ला अदालत सिरहाबाट म्याद थप गरी अनुसन्धान थालिएको छ ।