काठमाडौं– फिफा विश्वकप २०२२ तथा एसिया कप २०२३ को छनोट अन्तर्गतको कुवेत र चाइनिज ताइपेइसँग खेल्ने नेपाली राष्ट्रिय टालीको बिदाइ गरिएको छ । शुक्रबार अखिल नेपाल फुटबल संघ (एन्फा) ले सातदोबाटोस्थित नेपाल ओलम्पिक कमिटीको हलमा एक कार्यक्रम आयोजना गरी टोलीको बिदाइ गरेको हो ।

कार्यक्रममा बोल्दै एन्फा अध्यक्ष शेर्पाले खेलाडीहरुलाई कुवेतविरुद्धको खेलमा जीत हात पार्न सके पुरस्कारसहित सम्मान गर्ने बताएका छन् । यस्तै टोलीका मुख्य प्रशिक्षक योहान कालिनले टोलीले राम्रो अभ्यास गरेर बताउँदै सकेसम्म कुवेतसँग अंक खोस्ने लक्ष्य रहेको बताएका छन् ।

राष्ट्रिय टोलीका मुख्य प्रशिक्षकले विश्वकप छनोट तथा एसिया कपको छनोट चरणका लागि २३ सदस्यीय टोलीको घोषणा यसअघि नै गरिसकेका थिए । कुवेत जाने टोलीमा नियमित कप्तान विराज महर्जन रहेका छैनन् । यस्तै, मलेसियन क्लबविरुद्ध केही दिन अगाडि मैत्रीपूर्ण खेल खेल्दा टोलीमा रहेका विमल राना र एलन न्यौपाने पनि विश्वकप छनोट अन्तर्गत टोलीमा रहेका छैनन् ।

उनीहरुको स्थानमा यसअघि टोलीबाहिर रहेका उपकप्तान तथा गोलकिपर किरण चेमजोङ र मिड्फिल्डर रोहित चन्द रहेका छन् । छनोटको समूह ‘बि’ मा रहेको नेपालले सेप्टेम्बर ५ मा कुवेतसँग र सेप्टेम्बर १० मा ताइपेइसँग खेल्नेछ ।

नेपाली टोली

गोलकिपर: किरण चेमजोङ, विकेश कुथु, विशाल श्रेष्ठ

डिफेन्डर: सरोज दहाल, अजित भण्डारी, दिनेश राजवंशी, अनन्त तामाङ, देवेन्द्र तामाङ, राजिन धिमाल, सुमन अर्याल

मिफिल्डर:  सुनिल बल, रवि पासवाङ, अञ्जन बिष्ट, सुजल श्रेष्ठ, हेमन गुरुङ, विक्रम लामा, तेज तामाङ, सन्तोष तामाङ, विशाल राई, रोहित चन्द

फरवार्ड:  विमल घर्ती मगर, अभिषेक रिजाल, नवयुग श्रेष्ठ