काठमाडौं– गत असार ३१ गते काठमाडौंको धुम्बाराहीमा घाइते अवस्थामा फेला परेका व्यक्तिमाथि आक्रमण गर्ने व्यक्ति पक्राउ परेका छन् ।

गस्तीमा रहेको प्रहरीले घुम्बाराहीस्थित राजेश हार्डवेयर अगाडि साउन ३१ गते ३६ वर्षीय दिपक तामाङलाई गम्भीरु घाइते अवस्थामा फेला पारेको थियो ।

मोरङको कानेपोखरी घर घइ काठमाडौंको गोल्फुटार बस्दै आएका तामाङ टाउकोमा चोट लागेर बेहोस अवस्थामा फेला परेका थिए ।

प्रहरीले तामाङको उद्दार गरी काठमाडौंको बाँसबारीस्थित न्युरो अस्पताल भर्ना गरेको थियो । घटनाको अनुसन्धान गर्ने क्रममा तामाङमाथि ज्यान मार्ने उद्देश्यले आक्रमण भएको खुलेको थियो ।

प्रहरीले तामाङमाथि ज्यान मार्ने उद्देश्यले आक्रमण गरेको भन्दै सिन्धुपाल्चोक घर भइ बौद्ध बस्दै आएका १९ वर्षीय मनोज लामाको खोजी शुरु गरेको थियो ।

प्रहरीको खोजी सूचीमा रहेका लामा बिहीबार पक्राउ परेका छन् । महानगरीय अपराध मशाखाको टोलीले लामालाई पक्राउ गरेको हो ।

महाशाखाका अनुसार लामाले आफूले गरेको कसूर स्वीकार गरिसकेका छन् । प्रहरीले लामाविरुद्ध ज्यान मार्ने उद्योगअन्तर्गतको अभियोगमा थप अनुसन्धान भइरहेको जनाएको छ ।