काठमाडौं– सोमबार राति काठमाडौंको कलंकीमा भएको गोली प्रहारमा संलग्नको आशंकामा प्रहरीले एकजनालाई नियन्त्रणमा लिएको छ ।

सोमबार राति कलंकीमाई मन्दिर नजिकै रहेको विष्णुप्रसाद शर्माको ३ तले घरमा गोली प्रहार भएको घटनामा संलग्न रहेको आशंकामा प्रहरीले १ जनालाई हतियारसहित नियन्त्रणमा लिएको हो ।

महानगरीय अपराध महाशाखा र महानगरीय प्रहरी परिसर काठमाडौंको टोलीले सडक डिभिजन कार्यालयका पूर्व इन्जिनियर शुभाकर खनाललाई नियन्त्रणमा लिएको हो ।

महानगरीय अपराध महाशाखा स्रोतका अनुसार उनको साथबाट २ थान हतियार र त्यसमा लाग्ने गोली करिब ४५–५० राउण्ड बरामद भएको छ । उक्त हतियार इजाजत (लाइसेन्स)प्राप्त रहेको महाशाखा स्रोतले जानकारी दियो ।

प्रहरीका अनुसार अहिले उक्त हतियारको परीक्षणका लागि प्रहरीको फरेन्सिक ल्याब पठाइएको छ ।

‘उक्त हतियारबाट गोली चलेको हो हैन भन्ने विषयमा हामीले अहिले परीक्षण गरिरहेका छौं,’ महानगरीय प्रहरी परिसर काठमाडौंका एक अधिकारीले खबरहबसँग भने, ‘परीक्षण रिपोर्ट आएपछि थप कारबाही अगाडि बढाउँछौं ।’

हतियारसहित नियन्त्रणमा लिइएका खनाल भने अहिले अपराध महाशाखाको नियन्त्रणमा छन् । महाशाखाले खनालमाथि अनुसन्धान गरिरहेको जनाएको छ ।

कलंकीमाईस्थित शर्माको घरमा गोली चलेको खबर पाउनासाथै प्रहरीले घटनास्थल वरपर खानतलासी शुरु गरेको थियो । प्रहरीले सोमबार राति नै खनालको घरमा खानतलासी गर्न खोजेपनि उनको परिवारले ढोका खोलेको थिएन ।