काठमाडौं- नेपाल प्रहरीको केन्द्रीय अनुसन्धान ब्यूरोले वैदेशिक रोजगार ठगी मुद्दाका प्रतिवादीलाई पक्राउ गरी जेल चलान गरेको छ ।

ब्यूरोको टोलीले सर्वोच्च अदालतको २०७५ असार २६ को फैसलाअनुसार दोषी ठहर सुनाइएकी पाल्पाकी टीकाकुमारी थापालाई आइतबार महाराजगञ्जबाट पक्राउ गरेको हो ।

ब्यूरोका प्रवक्ता, प्रहरी उपरीक्षक दीपक रेग्मीले वैदेशिक रोजगारी ठगी मुद्दामा नमिता देवले दिएको जाहेरीका आधारमा थापालाई पक्राउ गरिएको जानकारी दिए ।

“थापाले वैदेशिक रोजगार व्यवसाय सञ्चालन गर्ने इजाजतपत्र विना नै आकर्षक रोजगारी दिलाइदिने भन्दै रकम ठगी गरेको अनुसन्धानमा खुलेको छ”, प्रवक्ता रेग्मी भने । पक्राउ थापालाई अदालतले एक वर्ष ६ महीना कैद र रु एक लाख ५० हजार जरिवाना सुनाएको थियो ।

पक्राउ थापालाई फैसला कार्यान्वयनका लागि काठमाडौँ जिल्ला अदालतमा पेश गरेकामा अदालतको आदेशानुसार कैद भुक्तानका लागि केन्द्रीय कारागार कार्यालय सुन्धारा पठाइएको ब्यूरोले जनाएको छ ।