काठमाडौं– सुर्खेतको लेकवेसी नगरपालिका–७ स्थित आदर्श माध्यमिक विद्यालयमा नक्कली शिक्षक देखाएर २ लाख ३८ हजार ५ सय ३० रुपैयाँ हिनामिना गरिएको पाइएको छ ।

विद्यालयका प्राधानाध्यापकसहित १ शिक्षक र स्रोत व्यक्तिको मिलेमतोमा शिक्षक नियुक्त गरिएको नक्कली कागजात पेश गरेर जिल्ला शिक्षा कार्यालयबाट २ लाख ३० हजार रुपैयाँ हिनामिना गरेको पाइएको हो ।

अख्तियार दुरुपयोग अनुसन्धान आयोगले गरेको छानबिनबाट प्रधानाध्यापक भीम बहादुर ज्ञामी, लेखा शिक्षक भक्तबहादुर ज्ञामी र स्रोत व्यक्ति (आरपी) दल बहादुर सिंहको मिलेमतोमा नक्कली शिक्षक खडा गरी अनियमितता गरेको पाइएको हो ।

अख्तियारले नक्कली शिक्षक खडा गरी सरकारी रकम हिनामिना गर्ने तीनैजनाविरुद्ध जनही २ लाख ३८ हजार ५ सय ३० रुपैयाँ बिगो तथा जरिवाना मागदाबी गर्दै आइतबार विशेष अदालत काठमाडौंमा मुद्दा दायर गरेको छ ।