काठमाडौं– अख्तियार दुरुपयोग अनुसन्धान आयोगले त्रिभुवन अन्तर्राष्ट्रिय विमानस्थलस्थित अध्यागमन कार्यालयका नायब सुब्बा ललित कुमार झाविरुद्ध डेढ करोड रुपैयाँ बढी बिगो दावी गर्दै भ्रष्टाचार मुद्दा दायर गरेको छ ।

अख्तियारले झासहित उनकी श्रीमत सुचिता देवी झाविरुद्ध पनि सोहीअनुसार बिगो दावी गर्दै विशेष अदालतमा भ्रष्टाचार मुद्दा दायर गरेको हो ।

अख्तियारले गरेको छानबिनबाट १७ असार २०४० देखि सरकारी सेवा प्रवेश गरेका झाले गत ज्येष्ठ मसान्तसम्म बैध स्रोतबाट २ करोड २८ लाख ६४ हजार २ सय ८ रुपैयाँ बराबर आम्दानी गरेका छन् । तर, सोही अवधिमा झाले आफूसहित आफ्नी श्रीमती सुचिताको नाममा ३ करोड ८५ लाख ४३ हजार २ सय ३४ रुपैयाँ बराबरको लगानी तथा खर्च गरेको अख्तियारले जनाएको छ ।

झाले खर्च तथा लगानी गरेको रकममध्ये १ करोड ५६ लाख ७९ हजार २७ रुपैयाँको स्रोत नखुलेको भन्दै अख्तियारले उनीविरुद्ध सोही रकम बराबर बिगो तथा जरिवाना र कैद सजाय मागदावी गर्दै विशेष अदालतमा मुद्दा दायर गरेको हो ।