काठमाडौं– सत्तारुढ दल नेपाल कम्युनिष्ट पार्टी(नेकपा)का अध्यक्ष पुष्पकमल दाहाल (प्रचण्ड)ले नेपालको कम्युनिस्ट आन्दोलनका विचारको खडेरी परेका बताएका छन् ।

वैचारिक बहसमा केन्द्रित नभए नेपालको कम्युनिस्ट आन्दोलन गम्भीर दुर्घटनामा फस्ने खतरा रहेको पनि प्रचण्डको भनाइ छ ।

१ सय ३० औं अन्तराष्ट्रिय श्रमिक दिवसको अवसर पारेर मंगलबार काठमाडौंमा आयोजित एक कार्यक्रममा बोल्दै प्रचण्डले मजदुरहरुले पनि समाजवादी कित्ताको पक्षमा उभिएर अघि बढ्नुपर्ने बताए ।

विश्वमा ठूल्ठूला आन्दोलन, क्रान्ति र परिवर्तन विचारको बलमा भएको उल्लेख गर्दै प्रचण्डले भने, ‘नेपालमा पनि समाजवादको आधार निर्माण हुने गरी विचारको बहसलाई अघि बढाउन जरुरी छ ।’

अध्यक्ष दाहालले समाजवादको आधार तयार पार्न सोही अनुसारको पार्टी संगठन, विचार, कार्यशैली र संरचनाको सुधारमा सबैले जोड दिनुपर्ने बताए ।