सिरहा– सिरहाको मिर्चैयामा विवाहको सम्पूर्ण चाँजोपाँजो मिलाएर दुलही लिनका लागि जन्ती हिडिसकेको अवस्थामा विवाह रोकिएको छ ।

बालविवाह हुन लागेको थाहा पाएपछि उक्त विवाह गैह्र कानूनी भएको भन्दै प्रहरीले दुवै पक्षलाई सम्झाउँदै विवाह रोकेको हो । प्रहरी विवाहस्थलमै पुगेर विवाह रोकेपछि बेहुला र जन्ती बाटोबाटै फर्किएका थिए।

सिरहाको मिर्चैया नगरपालिका १२ सिक्रौन गाउँमा बिबाह हुन लागेको थियो । दुलही बन्न लागेकी सियाकुमारी कामैत उमेरले जम्मा १५ वर्ष पुगेकी छन् ।

बालिकाको विवाहको लागि उमेर नै नपुगेको थाहा पाएपछि अधिकारकर्मीले प्रहरीलाई खबर गरेका थिए । प्रहरीले अधिकारकर्मी र वडाध्यक्ष सहितको समन्वयमा जन्ती आउनुअघि नै गाउँमा पुगेर विवाह रोकेको जानकारी दिएको छ ।