कीर्तिमानी धावक हरि बहादुर रोकायाद्वारा सञ्चालित कर्णाली स्पोर्टस् क्लबलाई लेबल्स फेशन प्रालिले आर्थिक सहयोग गरेको छ । मंगलबार राजधानीमा कार्यक्रम आयोजना गरी लेबल्स प्रालिका निर्देशक राजिव श्रेष्ठले क्लबलाई २ लाख ५० हजार रुपैयाँ नगद सहयोग प्रदान गरेका हुन् ।

उनले १ लाख रुपैयाँ क्लबलाई र १ लाख ५० हजार रुपैयाँ क्लबले हरेक वर्ष आयोजना गर्ने एथ्लेटिक्स प्रतियोगिताका लागि सहयोग गरेको लेबल्सका निर्देशक श्रेष्ठले जानकारी दिए । नेपालको विकट ठाउँमा हुने यस्ता प्रतियोगितालाई बढावा दिन सहयोग गरेको श्रेष्ठले बताए ।

२०६४ सालबाट कर्णालीको जुम्लामा स्थापना गरिएको कर्णाली स्पोट्स क्लबले अहिलेसम्म नेपाली एथ्लेटिक्समा उदाहरणीय खेलाडी उत्पादन गरेको छ । त्यसमध्ये पनि महिला एथ्लेटिक्स खेलाडीका लागि कर्णाली स्पोट्स क्लब उर्वर मानिन्छ ।

अहिलेसम्म कर्णालीका उत्पादन नेपालका चर्चीत धावक विश्वरुपा बुढा देखि सुनमाया बुढा, विष्णुमाया बुढा, रेजिना भण्डारी र पूर्णलक्ष्मी भण्डारीले राष्ट्रिय तथा अन्तर्राष्ट्रिय स्तरमा आफूलाई स्थापीत गरिसकेका छन् ।

आर्थिक सँगै लेबल्सले मे १ देखि ३१ मे सम्म सञ्चालन गर्न लागेको जुत्ता एक्सचेन्जबाट उठेका जुत्ता कर्णाली स्पोट्स क्लबलाई दिने घोषणा गरेको छ ।

सहयोगका लागि कर्णाली स्पोर्टस् क्लबका संस्थापक धावक रोकायाले धन्यवाद दिँदै आगामी दिनमा सहयोग अझै बढ्नेमा विश्वास व्यक्त गरे ।