महोत्तरी- महोत्तरीमा सञ्चालित उपनिर्वाचनमा बिहान ७ बजेदेखि मतदान जारी छ । उच्च सुरक्षा सतर्कतासहित मतदान जारी रहेको स्थानीय प्रशासनले जनाएको छ ।

मतदान केन्द्रमा आएका सबै मतदाताको उचित निगरानीपछि मात्र मतदानकेन्द्र भित्र पठाएको प्रहरीले जनाएको छ ।

महोत्तरीमा एक गाउँपालिका अध्यक्ष तथा तीन वडा अध्यक्ष पदमा उपनिर्वाचन हुँदैछ । पिपरा गाउँपालिकामा गाउँपालिकाको अध्यक्ष र मटिहानी नपा–६ तथा बल्वा नपा–२ र ८ मा वडा अध्यक्ष चयनका लागि उपनिर्वाचन हुँदैछ ।

महोत्तरीका प्रमुख जिल्ला अधिकारी सुर्यबहादुर खत्रीले उपनिर्वाचन निष्पक्ष र भयरहित वातावरणमा सम्पन्न हुने बताएका छन् ।

उनले थोरै स्थानमा मतदान हुने भएपनि मतदान हुने स्थलहरूलाई संवेदनशील र अति संवेदनशील गरी दुई भागमा छुट्याइएको बताउँदै सुरक्षाको तर्फबाट कुनै कसर बाँकी नरहने बताए ।

उनले तत्कालै सुरक्षाकर्मीको सङ्ख्या निर्धारण भएर नआएको बताउँदै निर्वाचन सुरक्षा योजना अनुसार गत निर्वाचन जस्तै नेपाल प्रहरी, सशस्त्र प्रहरी र नेपाली सेनाको सुरक्षा घेरा हुने बताए ।