काठमाडौं– समाजवादी पार्टीका वरिष्ठ नेता अशोक राईले ज्ञानेन्द्र शाहीमाथि भएको आक्रमणले पञ्चायती शैलीको झल्को दिएको बताएका छन् ।

बुटवलमा आयोजित कार्यक्रममा नेता राईले भ्रष्टाचार विरोधी अभियन्ता शाहीमाथि शनिबार चितवनमा भएको आक्रमणले आफूलाई पञ्चायतमा भएको आक्रमणको सम्झना गराएको बताए ।

भ्रष्टाचार र घुसखोरी वर्तमान सरकारका पालामा बढेको आरोप लगाउँदै उनले यसको न्यूनीकरण नभए जनता निरास भएर सडक संघर्षमा उत्रिने चेतावनी दिए ।

उनले पार्टी सरकारमा रहेको भएपनि सरकारका गलत कार्यको विरोध गर्न आफूहरुलाई कुनै नैतिक संकट नभएको पनि बताएका थिए ।

उनले प्रधानमन्त्री केपी शर्मा ओलीले आफ्ना कार्यकर्ताहरुलाई नियन्त्रण नगर्न नसके त्यसले लोकतन्त्रलाई असर पुग्ने चेतावनी दिए ।