काठमाडौं – हिन्दू नेपालीहरुको चाड दशैं आजबाट शुरु भइसकेको छ । दशैंको टीका नजिकिएसँगै देश बाहिर रहेका नेपालीहरु घर फर्किने क्रम चलिरहेको छ भने नेपालमै भएरपनि घरबाट टाढा रहेकाहरु दशैं मनाउनकै लागि घर फर्किने थालिसकेका छन् ।

१३ औं दक्षिण एसियली खेलकुदको सरगर्मी बढीरहँदा राष्ट्रिय खेलकुद परिषद् (राखेप) ले खेलाडीहरुलाई दशैंका लागि भनेर ५ दिनको सार्वजनिक विदा दिने बताइसकेको छ ।

तर, केही खेलाडीहरु चाँहि दशैं नजिकिएसँगै देश बाहिर पुगेका छन् ।

अहिले सिंगापुरमा त्रिकोणात्मक क्रिकेट शृङ्खला खेलिरहेको नेपाली क्रिकेट टोली र फिफा विश्वकप २०२२ तथा एसियन कप २०२३ छनोट खेलिरहेको राष्ट्रिय फुटबल टोली भने दशैंकै बीचमा विदेशमा हुनेछन् ।

अहिले सिंगापुरमा रहेको क्रिकेट टोली सिंगापुरमा अक्टोबर २ को त्रिकोणात्क शृङखलाको अन्तिम खेल सिंगापुरविरुद्ध खेलिसकेपछि ओमानमा हुने शृङ्खलाका लागि त्यसतर्फ प्रस्थान गर्नेछ ।

ओमानमा नेपालसहित आयरल्याण्ड,ओमान, हङकङ र नेदरल्याण्डसहभागी हुने शृङ्खला असोज १८ गतेशुरु भएर २३ गतेसम्म चल्नेछ भने क्रिकेट टोलीले ओमानमा दशैं मनाउँनेछ ।

यता, विश्व छनोटको दोस्रो चरण खेलिरहेको नेपाल यसैबीच अस्ट्रेलियासँगको खेलका लागि अस्ट्रेलिया जाँदैछ । नेपाली फुटबल टोलीले अक्टोबर १० अर्थात् असोज २३ गते हुने विश्व कप छनोट अन्तरगतको अवे खेल अस्ट्रेलियासँग खेल्नेछ ।

त्यसैका लागि नेपाली टोली अक्टोबर २ अर्थात् १५ गते अस्ट्रेलिया जाने तयारीमा रहेको छ । अस्ट्रेलिया जाने भएपछि नेपाली फुटबल टोलीका खेलाडीको यो दशैं पनि अस्ट्रेलियामा मनाउने भएको छ ।