एजेन्सी- भारतीय प्रधानमन्त्री नरेन्द्र मोदीले भारतले विश्वलाई शान्तिको सन्देश दिएको बताउँदै युद्ध नभएर बुद्ध दिएको जनाएका छन् ।

संयुक्त राष्ट्र संघको महासभालाई सम्बोधन गर्दै मोदीले भारतले विश्वलाई युद्ध नभएर बुद्ध दिएको बताएका हुन् । झण्डै १७ मिनेट भाषण गरेका मोदीले पाकिस्तानको नाम नलिइ घुमाउरो पारामा पाकिस्तानमाथि कडा टिप्पणी गरेका थिए ।

आतंकवाद विश्वका लागि खतरा भएको भन्दै उनले आतंकवादविरुद्ध विश्वलाई सतर्क रहन आग्रह गरे । उनले आतंकवाद कुनै एक देशको समस्या मात्रै नभएर विश्वकै समस्या भएकाले सबै एकजुट भएर यसविरुद्ध लड्नुपर्ने बताए ।

उनले भारत सरकारले अघि सारेका विभिन्न योजनाहरुको पनि चर्चा गरेका थिए । प्रधानमन्त्री मोदीले जलवायु परिवर्तनका लागि भारतको भूमिका निकै कम भएको पनि बताए ।

उनले भने इतिहास र पर क्यापिटा इमिसन्सको नजरबाट हेर्ने हो भने ग्लोबल वार्मिङका लागि भारतको भूमिका एकदमै न्यून रहेको बताउँदै यो समस्या समाधानका लागि कदम उठाउनेहरुमध्ये भारत अग्रणी देश रहेको जानकारी दिएका थिए।