अभिनेता दीपकराज गिरी आफ्नो फिल्म ‘छ माया छपक्कै’ को प्रचारमा जुटिसकेका छन् ।  यो फिल्ममा दीपेन्द्र लामाको निर्देशन छ भने रोहित अधिकारीको लगानी छ । फिल्म निर्माणको घोषणा गर्नुअघि नै यो फिल्म दशैँमा रिलिज हुने भनिएको थियो ।

तर, दशैँमा बलिउडको मंहगो फिल्म ‘वार’ रिलिज हुने भएपछि गिरीलाई आफ्नो फिल्मको रिलिज मिति तोक्न सकस भएको छ । यतिबेला यो फिल्म अब यो फिल्म असोज २४ मा धकेलिने सम्भावना छ ।

गिरी तिनै अभिनेता हुन्, जसले विदेशी फिल्मले पनि आफ्नो फिल्मलाई कुनै असर नपार्ने बताएका थिए । त्यसो त उनले नेपाली फिल्म एकसाथ रिलिज हुन नहुने धारणा पनि राख्ने गरेका छन् । तर, निर्माण गरिनु अगावै फिल्म दशैँमा रिलिज हुने भनिएकाले गिरीले जुनै हालतमा पनि दशैँमै ल्याउने धेरैको अपेक्षा थियो ।

अब भने दशैँको टीकापछि मात्र फिल्म रिलिज गर्ने तरखरमा निर्माण टिम रहेको छ ।

हुन त यसअघि पनि गिरीले चलचित्र ‘छक्का पञ्जा ३’ को प्रचारका क्रममा राम्रा फिल्म बनाए दशैँ कुर्न नपर्ने भन्दै अर्को वर्षदेखि आफ्ना कुनै फिल्म दशैँमा नआउने बताएका थिए । तर,  यस्तो धारणा राखेको केही समयपछि नै उनको टिमले दशैँमा फिल्म रिलिज हुने बताएको थियो ।

दीपकराज गिरीले विदेशी फिल्मसँग डराउन नहुने बताएका थिए । अहिले भने बलिउडकै फिल्मका कारण उनको टिमले रिलिज मिति तोक्न सकेका छैनन् ।

बलिउड फिल्म ‘वार’ को पनि उत्तिकै चर्चा छ । नेपाली फिल्म उद्योगमा बलिउड फिल्म कतिसम्म हाबी भएको छ भन्ने हेर्न त दशैँ कुर्नपर्ने पनि छैन । भोलि शुक्रबारदेखि रिलिज हुन लागेको फिल्म ‘साहो’ का कारण नेपाली फिल्म ‘मारुनी’ चेपुवामा परेको छ ।

यस्तो अवस्थामा प्रतीक्षित बलिउड फिल्म ‘वार’ ले पनि यस्तो अवस्था ल्याउने हो कि भनेर सचेत हुनु सामान्य नै हो । तर, यतिबेला भने दीपकराज गिरीलाई आफ्नै बोली भारी भएको भन्दै कतिपयले तर्क गर्न थालेका छन् ।