लिमा– पेरुका राष्ट्रपति मार्टिन भिस्काराले निर्धारित समय अगावै आम निर्वाचन घोषणा गर्ने प्रस्ताव गरेका छन् ।

मुलुकमा जारी ‘संस्थागत संकट’ समाधानका लागि राष्ट्रपति भिस्काराले आम निर्वाचन घोषणा गर्ने प्रस्ताव गरेका हुन् । पेरुमा सन् २०२१ मा मात्र आम निर्वाचन हुने कार्यक्रम भएपनि राष्ट्रपति भिस्काराले आगामी वर्ष २०२० मा नै आम निर्वाचनको मिति घोषणा गर्ने प्रस्ताव गरेका हुन् ।

परम्परागत स्वतन्त्रता दिवसका दिन सम्बोधन गर्दै राष्ट्रपति भिस्काराले आफ्नो तथा कंग्रेसको कार्यकाल सन् २०२० जुलाई २८ सम्म मात्र रहनेगरी कदम चाल्न लागिएको बताएका हुन् ।

उनले तयार पारेको भ्रष्टाचारविरोधी प्रस्ताव कंग्रेसले पारित नगर्ने भएपछि राष्ट्रपतिको पछिल्लो घोषणा आएको हो । यता विपक्षीहरुले भने राष्ट्रपतिको यो घोषणाको विरोध गरेका छन् । उनीहरुले राष्ट्रपतिको यो घोषणाबाट अनिश्चितता र राजनीतिक संकट बढ्ने चेतावनी दिएका छन् ।

पेरुको कंग्रेसमा विपक्षीको बहुमत रहेकाले राष्ट्रपति र कंग्रेसबीच गतिरोध उत्पन्न हुँदै आएको छ । यसअघि राष्ट्रपति भिस्काराले पटक पटक कंग्रेस विघटन गर्ने चेतावनी दिँदै आएका छन् ।