लखनउ– भारतका एकजना विधायकमाथि बलात्कारको आरोप लगाउने किशोरी सडक दुर्घटनामा परेकी छिन् ।

भारत उत्तर प्रदेशस्थित उन्नाव क्षेत्रका विधायक कुलदीप सिंह सेंगरविरुद्ध बलात्कार गरेको आरोप लगाउने किशोरी चढेको कारलाई रायबरेली शहरनजिकै ट्रकले ठक्कर दिएको थियो ।

घटनामा बलात्कारको आरोप लगाउने किशोरीकी काकी र सानिमाको ज्यान गएको थियो । दुर्घटनामा परेकी किशोरीको भने अवस्था गम्भीर रहेको र भेन्टिलेटरमा राखेर उनको उपचार भइरहेको भारतीय सञ्चारमाध्यमले जनाएका छन् । हाल लखनउको केएमजी अस्पतालमा उनको उपचार भइरहेको उनको फोक्सो र अस्थीपञ्जरमा नराम्रो चोट लागेको बताइएको छ ।

त्यसबाहेक ती किशोरीका वकिल महेन्द्र सिंह समेत दुर्घटनामा गम्भीर घाइते भएका छन् । यता उनका आफन्तले भने विधायक कुलदीप सिंह सेंगर र उनका भाइ मनोजसहित अरु व्यक्तिहरुविरुद्ध हत्या, हत्याको षड्यन्त्रलगायतका अभियोगमा किटानी जाहेरी दिएका छन् ।

उत्तर प्रदेशका मुख्यमन्त्री योगी आदित्यनाथले भने यस दुर्घटनाबारे त्यहाँको केन्द्रिय अनुसन्धान व्यूरो सीबीआईमार्फत् अनुसन्धान गर्न सकिने जनाएका छन् । त्यहाँको प्रहरीले यस घटनाका लागि सीबीआईको जिम्मा लगाउने जनाएको छ ।

सत्तारुढ भारतीय जनता पार्टीका विधायक सेंगर गत वर्ष भारतको उन्नाउ शहरमा १७ वर्षे किशोरीमाथि भएको बलात्कार प्रकरणमा मुछिएका थिए । सेंगरलाई गत वर्ष नै हिरासतमा लिइएर अनुसन्धान गरिएको थियो ।