सान होजे– अमेरिकाको क्यालिफोर्निया राज्यमा अदुवा महोत्सवमा बन्दुकधारीले आक्रमण गर्दा बन्दुकधारीसहित ४ जनाको ज्यान गएको छ ।

क्यालिफोर्निया राज्यको गिलरोय शहरमा आयोजित गार्लिक फेष्टिभल भनिने अदुवाका परिकारको महोत्सव चलिरहेका बेला बन्दुकधारीले जथाभावी गोली प्रहार गरेका थिए । गोलीकाण्डमा ३ जना मारिनुका साथै अरु १५ जना घाइते भएको गिलरोय शहरको प्रहरीले जनाएको छ ।

गोली चल्न थालेको केही मिनेटभित्रै प्रहरी घटनास्थलमा पुगेको थियो । त्यसलगत्तै प्रहरीको गोली लागेर बन्दुकधारीको पनि ज्यान गएको प्रहरीले जनाएको छ ।

गोलीकाण्डमा दुई बन्दुकधारीको सहभागिता रहेको प्रहरीको भनाइ छ । तर, गोलीकाण्डमा उनको सहभागिता कस्तो प्रकारको थियो भन्ने अनुसन्धान भइरहेको र उनको खोजीकार्य भइरहेको अधिकारीले जनाएका छन् ।

आक्रमण हुनुको कारणबारे केही स्पष्ट भइसकेको छैन । अमेरिकी नागरिकलाई बन्दुक राख्ने संवैधानिक अधिकार रहेकाले त्यहाँ बेलाबेला यस्ता गोलीकाण्ड हुँदै आएका छन् । गोलीकाण्डका कारण हरेक वर्ष हजारौंको ज्यान जाने गरेको छ ।