एजेन्सी-विश्व चर्चित मोवाइल आईफोन तथा आईपोड र आईम्याकका परिकल्पनाकार जोनी आइभले एप्पल कम्पनी छाडेका छन् । उनले नयाँ व्यवसाय शुरु गर्न भन्दै २ दशकदेखि कार्यरत कम्पनीबाट बिदा लिएका हुन् ।

एप्पल कम्पनीलाई विश्वकै मूल्यवान व्यवसाय बनाउन सहयोग गरेका उनले नयाँ र सिर्जनात्मक काम गर्ने बताएका छन् । एप्पललाई चर्चित बनाउने आईफोन, आईपोड र आईम्याकका कल्पनाकार आइभले लभफ्रम नामक व्यवसाय शुरू गर्ने र त्यसको पहिलो ग्राहक एप्पल हुने बीबीसीले उल्लेख गरेको छ ।

एप्पलका प्रमुख टिम कुकले ‘एप्पललाई पुनर्जीवन दिन जोनीको भूमिका महत्वपूर्ण रहेको बताएका छन् । जोनीले सन् १९९८ मा आईम्याक बनाएका थिए । आइभका एप्पलका साथी र सहयोगी मार्क न्युसनले पनि लभफ्रममा काम गर्ने बताइएको छ।

आईफोन इतिहासमै सबैभन्दा बढी नाफा कमाएको वस्तु हो । उनी सन् १९९६ मा एप्पलको आर्थिक अवस्था कमजोर भएको बेला डिजाइन स्टुडियोका प्रमुख भएका थिए।

एप्पलको आर्थिक अवस्थामा सुधार सन् १९९८ मा आईम्याक र सन् २००१ मा आईपोडको निर्माणपछि भयो। त्यसपछि उनकै नेतृत्वमा सन् २००४ – आईपोड मिनी बन्यो । सन् २००७ – आईफोन बन्यो भने सन् २००८ – म्याकबुक एअर, सन् २०१० – आईप्याड, सन् २०१५ – एप्पल वाच र सन् २०१६ – एअरपोड बनाएका थिए।