काठमाडौं- शनिबार बिहानै काठमाडौंको जमलमा कार दुर्घटना भएको छ । बा ११ च ३६०४ नम्बरको कार केशरमहलबाट जमलतर्फ जाँदै गर्दा दुर्घटनामा परेको हो ।

तीव्र गतिमा रहेको कार सडकमा उत्तानो परेपनि मानवीय क्षति नभएको प्रहरीले जनाएको छ ।

कारका चालक बिजेन दुवाल श्रेष्ठ घाइते भएका छन् । उनीसँगै कारमा रहेका अन्य ३ जना पनि सामान्य घाइते भएका छन् ।

दुर्घटनामा कारको इन्जिन नै निस्किएको छ । कार केही पर गएर उल्टिएको महानगरीय ट्राफिक प्रहरी प्रभाग दरबारमार्गका इन्स्पेक्टर दयाकृष्ण भट्टले जानकारी दिए ।

कार जमलको एल्लो प्यागोडा होटल अगाडी रेडिङमा ठोक्किएर दुर्घटनामा परेको हो । कार उछिटिएर जमलमा रोकिराखेको पर्यटकको माइक्रोलाइ ठक्कर दिन पुगेको थियो । चालकले मापसे गरेका कारण दुर्घटना भएको प्रहरीले जनाएको छ ।