काठमाडौं- सरकारले आर्थिक वर्ष २०७६/७७ मा खेलकुद क्षेत्रका लागि ३ अर्ब ९९ करोड रुपैयाँ बजेट विनियोजन गरेको छ । संघीय संसदमा बुधबार अर्थमन्त्री डा. युवराज खतिवडाले आगामी वर्षका लागि बजेट प्रस्तुत गर्दै नेपालले आयोजना गर्न लागेको १३औँ दक्षिण एसियाली खेलकुद प्रतियोगितालाई सफल पार्न आवश्यक बजेट विनियोजन गरेको बताए ।

यस्तै, नवौं राष्ट्रिय खेलकुदका लागि पनि आवश्यक बजेट विनियोजन गरिएको उनले जानकारी दिए । अर्थमन्त्री खतिवडाले प्रस्तुत गरेको बजेटमा क्रिकेटको विकासलाई प्राथमिकतामा राखिएको छ ।

मूलपानीमा निर्माणाधीन प्रस्तावित अन्तर्राष्ट्रिय क्रिकेट रंगशाला २ वर्षभित्र सम्पन्न गर्न १० करोड विनियोजन गरिएको जानकारी दिए । निजी क्षेत्रको सक्रियतामा हुने क्रिकेटलगायतका खेलको खेलमैदान निर्माणलाई सरकारले प्रोत्साहन गर्ने नीति लिएको बजेटमा उल्लेख छ ।

क्रिकेटको विकासका लागि एकेडेमी स्थापना गरिने अर्थमन्त्री खतिवडाले जानकारी दिए । त्यस्तै, प्रदेश स्तरीय रंगशाला, प्रदेश तथा स्थानीय तहको सह लगानीमा खेलग्रामको विकासका लागि ४० करोड बजेट छुट्याएको छ ।