जकार्ता– भारी वर्षासँगै आएको बाढी र पहिरोपछि इन्डोनेसियामा २९ जनाको मृत्यु भएको छ ।

इन्डोनेसियाको सुमात्रा टापुको दक्षिण पश्चिमी क्षेत्रमा रहेको बेङ्कुलु प्रान्तमा आएको बाढी र पहिरोबाट अरु दर्जनौं मानिसहरु हराइरहेको अधिकारीले जनाएका छन् ।

बाढी र पहिरोबाट अरु सयौं घरमा क्षति पुगेको र हजारौं मानिसहरुलाई सुरक्षित स्थानमा सारिएको बताइएको छ ।

त्यसबाहेक बाढी र पहिरोले बेङ्कुलु प्रान्तका २ जिल्लासँगको सडक तथा सञ्चार सम्पर्क अवरुद्ध भएको अन्तर्राष्ट्रिय सञ्चारमाध्यमले जनाएका छन् ।

त्यस्तै, बाढी पहिरोले यातायात, खानेपानी, विद्युत तथा अन्य पूर्वाधारमा पनि नराम्ररी क्षति पुगेको अधिकारीले जनाएका छन् ।

स्वच्छ खानेपानीको अभाव र ओसिलो वातावरणका कारण त्यहाँ महामारी फैलिनसक्ने भन्दै चिन्ता उत्पन्न भएको छ ।