काठमाडौं– सत्तारुढ दल नेपाल कम्युनिष्ट पार्टी (नेकपा) ले ‘समृद्ध नेपाल, सुखी नेपाली’को नारालाई व्यवहारमा कार्यान्वयन गर्ने गरी नीति तथा कार्यक्रम ल्याउन सरकारलाई सुझाव दिएको छ ।

प्रधानमन्त्री एवम् पार्टीका अध्यक्ष केपी शर्मा ओलीको अध्यक्षतामा बालुवाटारस्थित प्रधानमन्त्री निवासमा सोमबार बसेको पार्टी सचिवालय बैठकले ‘समृद्ध नेपाल, सुखी नेपाली’को नारालाई कार्यान्वयन गर्ने गरी नीति तथा कार्यक्रम ल्याउन सरकारलाई सुझाव दिएको हो ।

सरकारले आगामी २० गते (शुक्रबार) संघीय संसदमा नीति तथा कार्यक्रम पेश गर्ने तयारी गरेको छ ।

कार्यक्रम संसदमा पेश गर्नुअगाडि पार्टी सचिवालय वैठकमा नीति तथा कार्यक्रमबारे छलफल भएको हो ।

छलफलका क्रममा सचिवालय सदस्यहरुले नीति तथा कार्यक्रममा मुलुकमा भएको युगान्तकारी राजनीतिक परिवर्तनलाई व्यवहारमा अनुवाद गर्ने विषय समेटिनुपर्नेमा जोड दिएका थिए ।

नेताहरुलेसंविधानले निर्दिष्ट गरेको समाजवादअन्मुख समृद्धि, निर्वाचनमा बेला पार्टीले जारी गरेको घोषणा पत्र र सरकारले हालसम्म गरेका सकारात्मक काम तथा प्राप्त उपलब्धीको रक्षा गर्नेगरी आगामी नीति तथा कार्यक्रम ल्याइनुपर्नेमा जोड दिएका पार्टी प्रवक्ता नारायणकाजी श्रेष्ठले जानकारी दिए ।