काठमाडौं– पतीको निर्घात कुटाईबाट गम्भीर घाइते भएकी सुनिता यादवको उपचारका क्रममा निधन भएको छ । काठमाडौंको त्रि वि शिक्षण अस्पतालमा उनको मृत्यु भएको हो ।

वीरगञ्ज महानगरपालिका-२० की ३६ वर्षीया यादवको शुक्रबार मृत्यु भएको पर्सा प्रहरी प्रमुख प्रहरी उपरीक्षक रेवती ढकालले जानकारी दिए ।

उनका अनुसार श्रीमानको कुटाइबाट शरीरभरि र टाउकोमा समेत चोटपटक लागेको थियो ।

यादवलाई सुरूमा नारायणी उपक्षेत्रीय अस्पताल हुँदै वीरगञ्ज हेल्थ केयरमा भर्ना गरिएको थियो। त्यहाँ उपचार सम्भव नभएपछि चैत १२ गते शिक्षण अस्पताल ल्याइएको थियो।

कुटपिट गर्ने पति डाक्टर सचितानन्द यादवलाई गत शुक्रबार पर्सा प्रहरीले पक्राउ गरिसकेको छ। यादव गण्डकी उपक्षेत्रीय अस्पतालका मधुमेह तथा थाइराइड रोग विशेषज्ञ हुन्।