काठमाडौं– राप्रपा (संयुक्त) का अध्यक्ष पशुपतिशमशेर राणाले सरकारले जनताको मन जित्ने काम गर्न नसकेको आरोप लगाएका छन् ।

राष्ट्रिय प्रजातान्त्रिक गठबन्धनले शुक्रबार काठमाडौमा आयोजना गरेको कार्यक्रममा उनले सरकारको पछिल्लो क्रियाकलाप हेर्दा जनताको मन जित्ने कार्य गर्न नसकेको आरोप लगाएका हुन् ।

उनले बर्तमान सरकार भ्रष्टाचारमा लिप्त रहेको समेत आरोप लगाए ।  वाइडबडी प्रकरणमा भएको भ्रष्टाचार सरकारमा रहेका दलहरुले नै बाडिचुडी खाएको समेत आरोप लगाए ।

त्यस्तै, राणाले केन्द्रमा मौलाएको भ्रष्टाचारलाई सरकारले वडा वडामा लगेर भ्रष्टाचारकै विकेन्द्रीकरण गरेको टिप्प्णी गरे । जनताले दिएको दुई तिहाईको मतको अवमुल्यन हुने गरी काम नगर्न उनले सरकारलाई सचेत गराए ।

मुलुकमा ८१ प्रतिशत भन्दा बढी हिन्दु रहेको भन्दै नेपाललाई धर्मनिरपेक्षबाट हिन्दु राष्ट्रमा फर्काउनुपर्ने बताए । कार्यक्रममा सहभागी नेताहरुले राष्ट्रियता, प्रजातन्त्र, राजसंस्था र हिन्दुवादीहरुको एकता अहिलेको आवश्यकता भएको धारणा राखेका थिए ।