काठमाडौं– विभिन्न दल समर्थित विद्यार्थी संगठनहरुले माध्यमिक शिक्षा परीक्षा (एसइई)को प्रश्नपत्र आउट भएको विषयमा शिक्षा, विज्ञान तथा प्रविधि मन्त्री गिरिराजमणि पोखरेलेको राजीनामा माग गरेका छन् ।

३ ओटा अखिल क्रान्तिकारी, अखिल नेपाल विद्यार्थी युनियन, अनेरास्ववियू (पाँचौं) समाजवादी विद्यार्थी फोरम, राष्ट्रिय विद्यार्थी संघ, नयाँ शक्ति विद्यार्थी युनियन, राष्ट्रवादी विद्यार्थी संघ र नेपाल आदिवासी जनजाति विद्यार्थी संघले शिक्षामन्त्री पोखरेलको राजीनामा माग गरेका हुन् ।

एसइई परीक्षाको प्रश्नपत्र त्रुटिपूर्ण हुनु गम्भीर लापरवाही र प्रश्नपत्र आउट हुनु सरकारको गैरजिम्मेवारीपन भएको विद्यार्थी संगठनहरुको भनाइ छ ।

यस्तो कार्यले लाखौं विद्यार्थीको भविष्यमाथि ठूलो खेलवाड भएको उनीहरुको भनाइ छ ।

प्रश्नपत्रमा त्रुटी हुनु र परीक्षा अगावै प्रश्नपत्र आउट हुने जस्ता घटनाका कारण शिक्षामन्त्री पोखरेलले नैतिकताका आधारमा राजीनामा दिनुपर्ने विद्यार्थी संगठनहरुको माग छ ।

साथै प्रश्नपत्र आउट गर्ने कार्यमा संलग्नलाई कडा कारबाही गर्न विद्यार्थी संगठनले माग गरेका छन् ।