काठमाडौं– प्रदेश नम्बर २ मा माध्यमिक शिक्षा परीक्षा (एसइई)को प्रश्नपत्र आउट भएको विषयमा नेपाल प्रहरीको केन्द्रीय अनुसन्धान ब्यूरो (सिआईबी)ले अनुसन्धान गर्ने भएको छ ।

शुक्रवार शिक्षा, विज्ञान तथा प्रविधि मन्त्रालयमा बसेको केन्द्रीय सुरक्षा समितिको वैठकले प्रश्नपत्र आउट भएको विषयमा अनुसन्धान गर्ने जिम्मा सिआईबीलाई दिने निर्णय गरेको हो ।

शुक्रबार मध्याह्न बसेको केन्द्रीय सुरक्षा वैठकले देशभर पठाएका प्रश्नपत्र रुजु गर्ने निर्णय समेत गरेको छ ।

शुक्रवार साँझसम्म सबै प्रश्नपत्रको रुजु सकेर थप निर्णय लिइने जनाइएको छ ।

देशभरका १ हजार ९ सय ६९ वटै परीक्षा केन्द्रका लागि पठाइएको प्रश्नपत्र शुक्रबार साँझसम्म रुजु गरिसकिने शिक्षा मन्त्रालयका अधिकारीले जनाएका छन् ।