ब्रुनाई– ब्रुनाईले समलैङ्गिक यौन सम्बन्ध राख्ने र व्यभिचारमा संलग्न रहनेलाई ढुङ्गाले हिर्काएर मृत्युदण्ड दिने कानून ल्याएको छ ।

कट्टर इस्लामिक शरिया कानूनमा आधारित दक्षिणपूर्वी एशियाली मुलुक ब्रुनाईले समलैङ्गिकता र व्यभिचारमा संलग्नलाई ढुङ्गाले हिर्काएर मृत्युदण्ड दिने नयाँ कानून ल्याएको हो । कानून औपचारिक रुपमा आगामी अप्रिल ३ बाट लागू हुने बताइएको छ ।

त्यसबाहेक नयाँ कानूनअनुसार चोरी गर्ने मानिसहरुको हातखुट्टा काटिने छ । सबै सजायहरु ‘मुसलमानहरुको समूहको प्रत्यक्ष रोहबरमा’ दिइने बताइएको छ ।

ब्रुनाईमा त्यसैपनि उग्र इस्लामिक शरिया कानून प्रचलनमा रहेको बताइन्छ । त्यहाँ मदिरा सेवन गर्न प्रतिबन्ध छ भने शुक्रबार नियमित प्रार्थानामा सहभागी नहुनेलाई पनि सजायको व्यवस्था छ । त्यस्तै, विवाहअघि बच्चा पाए पनि कठोर सजायको व्यवस्था गरिएको छ ।

ब्रुनाईले पछिल्लो समय आपराधिक कानूनमा थप कडाई गर्दै लगेको बताइन्छ । तर, त्यसको अन्तर्राष्ट्रिय मानवअधिकारवादी संगठनहरुबाट भने तीब्र आलोचना भइरहेको बताइएको छ ।