काठमाडौं- नेपाल गुणस्तर तथा नापतौल विभागले मापदण्ड पूरा नगर्ने तीन वटा ठूला सिमेन्ट उद्योगलाई स्पष्टीकरण सोधेको छ।

विभागले चिनियाँ संयुक्त लगानीको होङसी सिमेन्ट, वृज सिमेन्ट र युनाइटेड सिमेन्टसँग स्पष्टीकरण माग गरेको हो । विभागले होङसीमा इनिसियल सेटिङ आधा घण्टामा हुनुपर्नेमा परीक्षणका क्रममा नभेटिएको जनाएको छ ।

वृज सिमेन्टको पीपीसी कम्प्रेसिभ स्ट्रेन्थ २१ एमपीए र आईआर २९ दशमलब ९ प्रतिशत नेपाल गुणस्तर ३८५ अनुसार नभएको पाइएपछि विभागले गुणस्तर नियमावली अनुसार १५ दिनको स्पष्टीकरण सोधेको छ ।

विभागका अनुसार युनाइटेड सिमेन्टमा पनि आइआर २ दशमलब ६ प्रतिशत रहेको छ। यो उद्योगलाई समेत गुणस्तर नियमावली अनुसार विभागले १५ दिने स्पष्टीकरण सोधिएको छ ।

सार्वजनिक लेखा समितिले सिमेन्टको गुणस्तरका बारेमा विभाग गम्भीर भएर काम नगरेको औल्याएको थियो । विभागले तीन उद्योगको नमूना संकलन गरेर प्रयोगशालामा परीक्षण गराउँदा नेपाल गुणस्तर अनुरुप नपाएपछि स्पस्टीकरण सोधेको विभागले जनाएको छ ।