काठमाडौं – फिल्म सुश्री सम्पत्ति निर्देशन गरेका सुब्रतराज आचार्यले फिल्म ‘के घर के डेरा’ निर्देशन गर्ने बताएका छन् ।

आचार्यका अनुसार यतिबेला फिल्मको स्किृप्टमै काम भइरहेको छ । फिल्मको स्किृप्ट चित्तबुझ्दो नभएसम्म फ्लोरमा नजाने उनले बताए ।

फिल्म निर्माणको औपचारिक घोषणा अझै गरिएको छैन । एक सामान्य मानिसको कथा फिल्ममार्फत देखाइनेछ ।

फिल्मको निर्माण ‘जात्रै जात्रा’ निर्माता सिंगे लामाले गर्नेछन् । यसअघि सुब्रतले अर्धकट्टी र सुश्री सम्पत्ति गरी दुई फिल्म निर्देशन गरेका थिए ।

दुवै फिल्म व्यावसायिक हिसाबले असफल भएका थिए । यद्यपि म्युजिक भिडियो निर्देशनमा भने सुब्रत परिचित छन् ।

यसअघि पनि के घर के डेरा नामक फिल्म बनेको थियो । उक्त फिल्मलाई प्रदीप रिमालले निर्देशन गरेका थिए ।