काठमाडौं– यही मंसिर २८ गतेदेखि शुरु हुने भनेर तय गरिएको शहीद स्मारक ‘ए’ डिभिजन लिग फुटबल प्रतियोगिताको ‘टाइसिट ड्र’ (खेलतालिका सार्वजनिक) प्रति २ क्लबहरुले विरोध जनाएका छन् ।

साविक विजेता मनाङ मर्स्याङ्दी र च्यासल युथ क्लबले प्रतियोगिताको नियमावली नै सार्वजनिक नभइ खेलतालिका सार्वजनिक गर्न लागिएको भन्दै विरोध जनाएका हुन् ।

अखिल नेपाल फुटबल संघले यो वर्षका ए डिभिजन लिगका लागि शुक्रबार खेलतालिका सार्वजनिक गर्ने तयारी गरेको छ ।

सातदोबाटोस्थित एन्फा कम्प्लेक्समा खेलतालिका सार्वजनिक गर्ने कार्यक्रम शुरु हुनेवित्तिकै मनाङ र च्यासलका पदाधिकारीहरुले प्रतियोगिताको नियमावलीबारे प्रश्न गरेका थिए ।

जवाफमा एन्फाका महासचिव इन्द्रमान तुलाधरले आइतबारसम्म नियमावलीको टुंगो लगाउने जानकारी दिएका थिए ।

तर, मनाङ र च्यासका पदाधिकारीहरुले भने प्रतियोगिताको नियमावली नै पारित नभइ खेलतालिका सार्वजनिक गर्न नपाइने भन्दै विरोध जनाएका हुन् ।

एन्फाले शुक्रबार नै खेलतालिका सार्वजनिक गर्ने आफ्नो पूर्वनिर्धारित कार्यक्रमबाट पछि हट्न नसकिने जनाएपछि मनाङ र च्यासलका पदाधिकारीहरु कार्यक्रमबाट बाहिरिएका छन् ।

आगामी मंसिर २८ गतेदेशि शुरु हुने भनेर तय गरिएको ए डिभिजन लिगमा १४ टीम सहभागी हुने जनाइएको छ ।