एजेन्सी– पाकिस्तानी सेनाले मुलुकको हिमालयन क्षेत्रमा रहेको नंगा पर्वत चढ्ने क्रममा हराइरहेका आरोहीको खोजी कार्य तीब्र पारेको छ ।

८ हजार १ सय २६ मिटर उचाईको नंगा पर्वत आरोहण गर्न पाकिस्तान पुगेका इटालीका डानियल नार्डी तथा बेलायती आरोही टम बलार्ड गत आइतबार देखि हराइरहेको पाकिस्तानका लागि इटालियन राजदूत स्टेफानो पोन्टेकोर्भोले जनाएका हुन् । हराइरहेका पर्वतारोहीको खोजीकार्यका लागि पाकिस्तानी सेनाको हेलिकोप्टर प्रयोग भइरहेको जनाइएको छ ।

टम महान् बेलायती पर्वतारोही अलिसन हार्गेभ्सका छोरा हुन् । हार्गेभ्स सन् १९९५ मा अरुको सहाराबिना एक्लै सगरमाथा आरोहण गर्ने पहिलो महिला बनेकी थिइन् ।

हराइरहेका दुबै पर्वतारोही नंगा पर्वत आरोहणका लागि यसअघि हरेक पटक असफल भएको मार्ग भएर शिखरमा पुग्ने क्रममा रहेको बताइएको छ । नंगा पर्वत पर्वतारोहणका लागि सबैभन्दा कठिन हिमाल मानिन्छ ।