काठमाडौं– प्रधानमन्त्री केपी शर्मा ओलीको सिंगापुरमा प्लाज़्मा फेरेसिस प्रकृयाबाट उपचार जारी रहेको छ ।

प्रधानमन्त्रीका प्रमुख राजनीतिक सल्लाहकार विष्णु रिमालले प्रधानमन्त्रीको स्वास्थ्य अवस्था सामान्य रहेको बताएका छन् । उनले प्रधानमन्त्रीको स्वास्थ उपचार प्रकृया अर्को साता सम्ममा पूरा हुने जानकारी दिएका छन्।

प्रधानमन्त्री ओलीको सिंगापुरस्थित नेसनल युनिभर्सिटी हस्पिटलमा उपचार भइरहेको छ । स्वास्थ्य परीक्षण तथा उपचारका लागि गत विहीबार सिंगापुर गएका प्रधानमन्त्री ओलीको शुक्रबारबाटै उपचार थालिएको थियो ।

‘प्रधानमन्त्री ओलीको मिर्गौलामा ‘एन्टीबडी’को मात्रा बढेकाले प्लाज्मा फेरेसिस प्रक्रियाद्वारा शुक्रबारबाटै उपचार सुरु थालिएको हो ।

यसअघि प्रधानमन्त्री ओली गत साउन १८ गते सिङ्गापुरको सोही अस्पतालमा उपचार गराइ सुधार भएपछि साउन २७ गते स्वदेश फर्किएका थिए ।

प्रधानमन्त्रीकी नीजि चिकित्सक प्रा डा. दिव्यासिंह शाह बुधबार मात्रै स्वदेश फर्किएकी छिन् ।