काठमाडौं – एसीसी यु–१९ एसिया कप क्रिकेटका लागि श्रीलंकामा अभ्यासरत नेपाली युवा टोलीले बिहीबार (भोलि) दोस्रो अभ्यास खेल खेल्ने भएको छ ।
नेपाली युवा टोलीले श्रीलंकाको फस्ट क्लास क्रिकेट क्लब बादुरेलियासँग दोस्रो खेल खेल्ने निश्चित भएको छ ।

मंगलबार पहिलो अभ्यास खेल खेलेको नेपाली टोली ३ विकेटले पराजित भएको थियो । श्रीलंकाको फस्ट क्लास क्रिकेट क्लब सिङहलेस क्रिकेट क्लब (एसएससी) को यु–२३ टिमसँग पहिलो अभ्यास खेलमा पराजित भएको हो ।

यस्तै, नेपालले तेस्रो तथा अन्तिम अभ्यास खेलमा चिल मारियन्ससँग खेल्नेछ ।

एसीसी यु–१९ एसिया कप क्रिकेट भदौ १९ देखि २८ गतेबाट हुँदैछ । प्रतियोगिताको आफ्नो पहिलो खेल आयोजक टोली श्रीलंकासँग भदौ २० गते खेल्दै एसिया कपको सुरुवात गर्नेछ ।

यस्तै दोस्रो खेल भदौ २२ गते बंगलादेश र अन्तिम खेल भदौ २४ गते युनाइटेड अरब इमिरेट्स (युएई) सँग खेल्नेछ । नेपाली युवा टोली भदौ ७ गते श्रीलंका पुगेको थियो ।