काठमाडौं- संस्कृति पर्यटन तथा नागरिक उड्डयन मन्त्रालयले नेपाल वैदेशिक रोजगार व्यवसायी संघलाई नेपाल भ्रमण वर्ष सन् २०२० को मनाउन आयोजक समितिमा राखेको छ ।

संस्कृति पर्यटन तथा नागरिक उड्डयन मन्त्री योगेश भट्टराईको अध्यक्षतामा बसेको समितिको बैठकमा नेपाल भ्रमण वर्ष सफल पार्न निजी क्षेत्रलाई समेत समावेश गरेको छ ।

नेपालबाट विमानस्थल बसपार्क प्रयोग गरी वैदेशिक रोजगारीमा जाने श्रमिकलाई भ्रमण वर्ष संकेत गर्ने क्याप र टिसर्ट लगाएर पठाउँदा नेपाल भ्रमण वर्ष प्रभावकारी पार्ने सरकारी योजना सफल बनाउन मद्दत पुग्ने बैठकमा संघका अध्यक्ष रोहन गुरुङले बताएका थिए । ।

म्यानपावर कम्पनीहरुले वार्षिक ३ लाख बढी कामदार संस्थागत रुपमा वैदेशिक रोजगारीमा पठाउने गरेका छन् । व्यक्तिगत, रिईन्ट्री बैधानिकीकरणको प्रक्रिया पूरा गरी वार्षिक ६ लाख भन्दाबढी नेपाली कामदार वैदेशिक रोजगारीमा जाने गरेका छन् ।

दैनिक ९ सयको संख्यामा जाने उनीहरुले भ्रमण वर्ष अंकित क्याप र टिसर्ट लगाएर विदेशी विमानस्थलमा उत्रिदा त्यसले नेपाल भ्रमण वर्षलाई प्रचारमा सहयोग पुग्ने धारणा राखिएको भन्दै समितिको आगामी बैठकमा छलफल हुने बताइएको छ ।