एजेन्सी– अमेरिकी राष्ट्रपति डोनाल्ड ट्रम्पले अ‍मेरिका–दक्षिण कोरिया संयुक्त सैन्य अभ्यास नहुने संकेत देखाएका छन् ।

भियतनामको राजधानी हनोईमा भएको ट्रम्प–किमबीचको दोस्रो वार्ता बिना निष्कर्ष टुंगिएपछि राष्ट्रपति ट्रम्पले दक्षिण कोरिया र अमेरिकाले संयुक्त सैन्य अभ्यास गर्ने घोषणा गरेका थिए ।

अमेरिकी राष्ट्रपति ट्रम्पले फ्रान्सको राजधानी पेरिसमा जारी जी–७ समिटका क्रममा दिएको अभिव्यक्तिले तत्कालका लागि अमेरिका–दक्षिण कोरिया संयुक्त सैन्य अभ्यास टर्ने सम्भावना देखिएको हो ।

अन्तर्राष्ट्रिय सञ्चारमाध्यमले जनाए अनुसार राष्ट्रपति ट्रम्पले सैन्य अभ्यास ‘अनावश्यक’ र ‘पूर्णरुपमा पैसा खर्चमात्र’ हुने निष्कर्ष निकालेका छन् ।

उनले भनेका छन, “म मेरा सम्पूर्ण जनतालाई भन्छु कि यदि तपाईंले यो आवश्यक छ र उनीहरु संयुक्त सैन्य अभ्यास गरुन् भन्‍ने चाहना राख्नुहुन्छ भने संयुक्त अभ्यास हुनसक्छ यसमा कुनै हस्तक्षेप हुँदैन। तर, मरो विचारमा यो ‘अनावश्यक’ खर्च मात्र हो । मलाई स्पष्टरुपमा लाग्छ कि यो अनावश्यक हो ।”

उत्तर कोरियाले समेत अमेरिका र दक्षिण कोरियाको संयुक्त सैन्य अभ्यास नगर्न चेतावनी दिँदै आएको छ । उत्तर कोरियाले यूएस–दक्षिण कोरिया संयुक्त सैन्य अभ्यासको कार्यक्रम स्थगित नगरेसम्म कुनै पनि प्रकारको संवाद नगर्ने अडानसहित बारम्बर न्युक्लियर मिसाइल प्रक्षेपण गर्दै चेतावनी दिइरहेको छ ।

उत्तर कोरियाले गत शनिबार पनि दुई मिसाइल परीक्षण गरेको थियो । राष्ट्रपति ट्रम्पले भने उत्तर कोरियाको पछिल्लो आणविक परीक्षणले कुनै समझदारीको उल्लंघन नगरेको दोहोर्‍याइरहेका छन् ।