दोहा– अफगानिस्तानमा सक्रिय इस्लामिक लडाकु समूह तालिबानले अफगानिस्तानमा रहेका अमेरिकी फौज फिर्ता नभएसम्म अफगान सरकारसँग प्रत्यक्ष वार्ता नगर्ने अडान राखेको छ ।

कतारको राजधानी दोहामा रहेको तालिबानको राजनीतिक कार्यालयका प्रवक्ता सुहेल सहिनले अफगानिस्तानमा रहेका अमेरिकी फौज फिर्ता नभएसम्म अफगान सरकारसँग प्रत्यक्ष वार्ता गर्नुको औचित्य नरहेको जनाएका हुन् ।

यसअघि अफगान सरकारले तालिबानसँग आगामी दुई साताभित्र तालिबानसँग युरोपको अज्ञात मुलुकमा प्रत्यक्ष वार्ता हुने सम्भावना रहेको जनाएका थियो ।

शान्ति मामिलासम्बन्धी अफगानिस्तानका राज्यमन्त्री अब्दुल सलाम रहिमीले उक्त वार्ताका लागि अफगान सरकारले १५ सदस्यीय प्रतिनिधिमण्डलको घोषणा गर्ने जनाएका थिए ।

पछिल्लो समय तालिबान र अफगानिस्तानका लागि अमेरिकी विशेष प्रतिनिधि जमल्काए खालिदजादको प्रतिनिधिमण्डलबीच कतारको राजधानी दोहामा शान्ति वार्ताका विभिन्न चरणहरु चलिरहेका छन् ।

वार्ताका क्रममा अमेरिकाले अफगान सरकार र तालिबानबीच बेग्लै सहमति आवश्यक रहेको बताउँदै आएको छ । तर तालिबानले भने अफगान सरकारलाई अमेरिकी कठपुतलीको संज्ञा दिँदै अमेरिकासँगको वार्तालाई प्राथमिकता दिँदै आएको छ ।