भ्लादिभोस्तोक– उत्तर कोरियाले नियन्त्रणमा लिएको माछा मार्ने डुङ्गा रिहा गरेको छ ।

उत्तर कोरियाली जलक्षेत्रमा प्रवेश गरेपछि उत्तर कोरियाली तटरक्षकले रुसी माछा मार्ने डुङ्गा नियन्त्रणमा लिएका थिए ।

शनिबार उत्तर कोरियाले उक्त डुङ्गालाई छाडिदिएको रुसी अधिकारीले जनाएका छन् ।

उत्तर कोरियाको राजधानी प्योङयाङस्थित रुसी राजदूतावासका अनुसार उक्त डुङ्गामा १५ रुसी तथा २ दक्षिण कोरियाली नागरिक सवार थिए ।

रुसको नर्थ–इस्टर्न फिसिङ कम्पनीको सियाङ हाई लीन ८ नाम दिइएको उक्त डुङ्गा शनिबार साँझपख उत्तर कोरियाको पूर्वी बन्दरगाह शहर वोनसानबाट रुसतर्फ प्रस्थान गरेको रुसी राजदूतावासले जनाएको छ ।

गत जुलाई १७ मा रसियन नर्थ–इस्टर्न फिसिङ कम्पनीको उक्त डुङ्गालाई उत्तर कोरियाली सुरक्षाकर्मीले नियन्त्रणमा लिएका थिए ।

उक्त डुङ्गा दक्षिण कोरियाबाट जापानी समुद्रमा गंगटा मार्दै उत्तरतर्फ गएको थियो । अधिकारीहरुका अनुसार डुङ्गा उत्तर कोरियाली सीमाबाट करिब एक सय मिटर टाढा रहेको थियो ।