काठमाडौं – भदौ ६ गतेबाट प्रदर्शनमा आउने फिल्म ‘जाइरा’ को गीत सार्वजनिक गरिएको छ । ‘आँखैले बोल्छ’ बोलको रोमान्टिक गीत राजधानीमा एक कार्यक्रमको आयोजना गरी सार्वजनिक गरिएको हो ।

बिहीवार आयोजित कार्यक्रममा अभिनेता अनुपविक्रम शाही र नम्रता श्रेष्ठले नृत्यसमेत प्रस्तुत गरेका थिए ।

सन्तोष लामाको स्वर रहेको गतिमा कल्याण सिंहको संगीत र रवि मल्लका शब्द छन् । अनुप र नम्रताको नृत्य देख्न सकिने यो गीतमा अनुप र नम्रताको प्रेमभावलाई देखाउन खोजिएको छ । यही फिल्मका लागि नम्रताले कपालसमेत छोटो बनाएकी थिइन् ।

मार्सल आर्ट खेलाडीको कथामा निर्माण भएको यो फिल्ममा नम्रता र अनुपसँगै प्रमोद अग्रहरी, रेमनदास श्रेष्ठ, सिर्जना रेग्मी, सुजता श्रेष्ठ, सम्राट मगर लगायतका कलाकारको अभिनय रहेको छ ।

आसुतोष राज श्रेष्ठको निर्देशनमा बनेको यो फिल्म नम्रता अनुपका फ्यानका लागि प्रतीक्षित बनेको छ ।