काठमाडौं – आज शुक्रवारदेखि नेपालका सिनेमा घरमा दुई चलचित्र रिलिज भएका छन् । नेपालभरका हलमा दयाहाङ राई स्टारर फिल्म ‘आप्पा’ र ‘कीर्तिपुर’ प्रदर्शनमा आएका छन् ।

चलचित्र ‘आप्पा’ मा बाबुछोराको सम्बन्धलाई देखाइएको छ भने आजै रिलिज भएको चलचित्र ‘कीर्तिपुर’ तत्कालीन राजा पृथ्वीनारायण शाहले कीर्तिपुरमा आक्रमण गर्दाको कथालाई फिल्ममा उनिएको छ ।

‘आप्पा’ मा दयाहाङ राई, सिद्धार्थ राज तामाङ, तुलसी घिमिरे, अल्लोना काबो लेप्चा, अरुणा कार्की लगायतका कलाकारको शीर्ष भूमिका छ । अनमोल गुरुङको लेखन तथा निर्देशनमा तयार भएको यो फिल्मले बिहीवार गरेको प्रिमियरमा राम्रो प्रतिक्रिया पाएको थियो ।

यस्तै ऐतिहासिक विषयवस्तुमा निर्माण गरिएको फिल्म ‘कीर्तिपुर’ मा यशराज गराज, हिसिला महर्जन, मदनदास श्रेष्ठ, सुशील राजोपाध्याय, लक्ष्मी गिरी, सुरवीर पण्डित लगायतका कलाकारको अभिनय रहेको छ ।

अनन्तकुमार श्रेष्ठले निर्माण गरेको यो फिल्मलाई प्रदीप खड्गीले निर्देशन गरेका हुन् ।