काठमाडौं– तनहुँमा एक मन्दिर निर्माणमा अनियमितता गरेको भन्दै अख्तियार दुरुपयोग अनुसन्धान आयोगले २ जना प्राविधिकविरुद्ध भ्रष्टाचार मुद्दा दायर गरेको छ ।

अख्तियारले तत्कालीन जिल्ला विकास समिति (हाल जिल्ला समन्वय समिति)को कार्यालय तनहुँका सबइन्जिनियर खगेन्द्र खवास र ब्यास नगरपालिकाका प्राविधिक सबइन्जिनियर निर्मल वाग्लेविरुद्ध मंगलबार विशेष अदालतमा भ्रष्टाचार मुद्दा दायर गरेको हो ।

तनहुँको कालिका शहीद शान्ति पार्क निर्माणको लागि आएको रकम हिनामिना भएको भन्ने उजुरीमाथि अनुसन्धान गर्दा उनीहरु त्यसमा उनीहरुको ‘संलग्नता’ देखिएको अख्तियारको दाबी छ ।

कालिका मन्दिर निर्माण कार्यको सिलसिलामा लाग अनुमान बमोजिमको काम भए नभएको जाँचबुझ गरी प्रतिबेदन बुझाउनुपर्नेमा उनीहरुले निर्माणसँग सम्बन्धित विषयमा नभएका काम पनि उल्लेख गरेर प्रतिवेदन बुझाएको अख्तियारको दाबी छ ।

अख्तियारदे दुवैजनाविरुद्ध भ्रष्टाचार निवारण ऐन २०५९ को दफा (१९) को उपदफा (२) बमोजिम कैद सजाय मागदाबी गर्दै विशेष अदालतमा मुद्दा दायर गरेको हो ।